كيف تفوز في مسابقة موهوب؟

بسم الله الرحمن الرحيم، أنا صالح النجراني، اليوم أشارك معكم قصتي مع مسابقة موهوب وكيف اجتزتها في قسم في الفيزياء ولله الحمد بالميدالية البرونزية. في البداية أحب أنوه أن الإنسان طبيعي جدًا يكون ما يعرف وش ميوله أو وش يحب في سنوات حياته المبكرة، طبيعي جدًا وهذي تعتبر عقدة عند كثير من الطلاب اليوم، منبعها تسليط الإعلام الغير حقيقي على الناجحين بأنهم كانوا يعرفون ما يريدون منذ الصفر ودهاليز الأمر بأكمله وهذا الشيء ما هو صحيح، نحن بشر وتتغير قناعاتنا مع الوقت ونتخبط إلى ما نصل بفضل الله للي يناسبنا.

بداية اهتمامي بالعلوم كانت في الصف الرابع ابتدائي يوم قابلت أستاذ من أحسن من قابلت، كان يحفز الطلاب بشكل غير طبيعي ويخليهم يكتبون في الدفتر أسئلة وأجوبة ويخلينا نختبر منها(إلى اليوم هذا وأنا استعمل هذي الطريقة) فتحفزت معه وبديت أصير مهتم بكل حرف يقوله إلى درجة صرت معروف في حصة العلوم بإني أكثر واحد مركز مع الأستاذ ومتفاعل معه، ونما هذا الأهتمام معي إلى أن وصلت للصف السادس،طبعًا ما كنت اتخيل ان هذا بيكون مجالي لكن الأحداث جرتني له فبدأت أتابع قنوات تشرح المفاهيم الفيزيائية وأصولها وتاريخها مثل قناة شرفشتاين وغيرها من الـpop-science، وظل هذا الاهتمام مدفون.

في الإجازة الصيفية ما بعد الصف الثاني المتوسط تعرفت على مؤسسة موهبة وعزمت على إني أدخلها بكل وسيلة فحطيت عيني على برامجهم وبديت أشتغل لها وأبرزها مسابقة موهوب، فسجلت بـ 47 ريال ورحت وطبعت الحقيبة العلمية تقريبًا 100 صفحة وبديت أذاكر يوميًا 8 ساعات تتخللها مهامي الأساسية اليومية مثل الأكل والشرب أما باقي اليوم كامل فكنت فقط أذاكر.

طريقة مذاكرتي كانت كالآتي: جبت أوراق A4 حوالي 500 ورقة (تقدر تستبدلها بدفتر) وأعبيها حلول للأسئلة في الحقيبة، فكنت أقرأ كل كلمة في الحقيبة وأفهمها وأطبق عليها الحلول، طبعًا المذكرة حقت الفيزياء كانت جدًا معقدة بالذات الدروس الأخير خصوصًا على طالب حصيلته المعرفية ثاني متوسط ولو إني كنت أذاكر وأنا ثالث متوسط لكن باقي ما خذينا شيء فعلي، فالحل كان دروس اليوتيوب فتابعت سلسلة الشرح حقت موهبة للفيزياء كاملة وتابعت حلول لأسئلة الأعوام السابقة وأشوف وأطبق، وأيضًا كنت أتابع شروح أجانب يشرحون أشياء كانوا يغفلون عنها في الشرح في المقاطع أو الحقيبة، فحرفيًا كنت ابذل جهد جبار والله الهمني الصبر وكملت حتى لغتي الانجليزية مو ذاك الزود لكن فيه الترجمة في جوجل وعلى مقاطع اليوتيوب وحتى لو ما فيه تقدر تلقط الكلمات المفتاحية من الكلام وتنتبه 200% على الشرح في السبورة أو اللي يكتب عليه اللي يشرح.

الدروس الأخيرة طبعًا كانت صعبة جدًا جدًا حتى مع الشرح ما فهمت وفي أسئلة في المذكرة تسألك بشيء مو مذكور فالاجتهاد الشخصي والبحث المستمر مطلوب جدًا، على الاقل اني اعدتها مرات جدًا كثيرة وفهمت شذرات اضافةً لفهمي 200% للدروس الأولية اللي كانت غالبية الأسئلة منها، وهذا بسبب اعادة الدروس وفهمها بأكثر من طريقة والتدرب على الحل بأكثر من طريقة ففهمها بأساليب متعددة عشان تقوي عندك قوة التجريد في الموضوع المطلوب وهذا من أهم الأشياء اللي يقيسها الاختبار في رأيي.

طبعًا هذا كله في اختبار موهوب 1 ولله الحمد اختبرت وتأهلت لموهوب 2 اللي نختبره حضوري

في موهوب 2 الوضع مختلف شوي لأنهم بيعطونك مذكرة جديدة مكونة أيضًا من 100 تقريبًا ومواضيعها هي نفسها تقريبًا مفصلة مع زيادة خفيفة لمواضيع اخرى وربطها معها إضافةً لحذف المواضيع الأخيرة اللي بالمذكرة الأولى التعجيزية في رأيي، وبتكون مع مدرب على التيمز على مستوى عالي واللي درسني كان استاذ يدرس في الثانوي كان جدًا جدًا متعاون معنا ويشرح بذمة وضمير حتى انه عرض علينا يسوي لنا حصص اضافية لو اي شيء ما فهمناه وكان ما عنده مشكلة يتلقى الأسئلة على الخاص او على الحصة ويجاوب وما يصرفنا مثل المدارس، جزاه الله خير ورحم والديه.

في المذكرة الثانية كان لازم نحفظ خمس قوانين طويلة شوي علينا كطلاب متوسط مو لانها طويلة او معقدة، لا، بس كانت اول مره نحفظ قوانين فيزيائية بالانجليزي وفيها افكار منطقية واجد وفهمها يجسر عليك اللي انا ذكرته بالفهم العميق والمتعدد. ونصيحتي لحفظهم هي كتابته مرات كثييييير لانك في الاختبار ما تقول شيء شفوي فأستعجب من اللي يحفظها شفوي، الافضل في رأيي تكتبها مئات المرات لين تحفظها صم وتجرب تكتبها احيانا بالعربي عشان تخلي المدخلات متعددة والمخرجات موحدة وهذا شيء بيعزز فهمك جدًا (كنت حتى مرات بالكلمات العربي ومرات بالحروف و90% من المرات بالاحرف الانجليزية القانون زي ما هو)، اول ما دخلت الاختبار كتبتها عشان ما انساها مع التوتر على آخر صفحة اللي نستخدمها كمسودة.

والحمد لله أختبرت وحصلت بفضل الله على الميدالية البرونزية، لكن أيش أهم النصايح اللي أنصحها للي بيختبرون موهوب2 ؟

أهم نصيحة قبل الأختبار أنك تكون شارب مويه(قبل الاختبار بساعة التعليل بعد قليل) لأنك مع قوة العصف الذهني اللي بيسببه لك الأختبار بتعطش من التوتر وأشياء كثير وأيضًا لازم لازم لازم تدخل الحمام قبل أداء الأختبار لو بدقيقة أدري أنها نقطة تضحك لكن فعلًا تفرق معك لأنك لو بتحل وأنت محشور ما بتقدر تجاوب نهائيًا على مستوى الأسئلة العالي، وأيضًا في أثناء مذاكرته نقطة اغفلتها الا وهي انه لازم تذاكر ككككل حاجة كل تساؤل ممكن يجي براسك وانت تذاكر بيجيبونه فلازم ما تتقيد فقط بالمذكرة، اي نقطة تم ذكرها ولو بشكل هامشي في المذكرة ابحث عنها وذاكرها من النت ضروري لان احتمال يجيبونها، وفي وسط الاختبار وارد جدًا ان الاختبار يكون مخادع فأنت لازم أنك تجرب بسرعة مره على القوانين وتفهم هو ايش يبغا منك بالضبط وما تستخدم القانون الغلط ولو ما عرفت في غضون 30 ثانية حط الارجح في راسك وانتقل للي بعده بسرعة وفي النهاية ارجع له وحتى مدة 30 ث غير دقيقة فانت احسب زمن الاختبار وزمن كل سؤال ولا تضيع وقت نهائيًا وادع الله وبسمل وخل اهلك يدعون لك قبل تختبر، وآخر نصيحة حاب أقولها بعد الاختبار وظهور النتيجة هي عدم البهرجة ممكن تحتفل او تعلم اصحابك والمقربين او حتى تنشرها لكن البهرجة ومن واقع تجربة ما تجر وراها الا الحسد ووجع الراس، مقدرين انك مبسوط وفرحان وهذا حقك لكن حاول تحجم البهرجة اللي طبيعي تصدر من اي شخص يتأهل للأولمبياد لكن التحجيم هو المطلوب.

أتمنى أنكم فعلًا استفدتم، ارجو من الله التوفيق للجميع.

والصلاة والسلام على أشرف الخلق والمرسلين.